ഒരു ബസ്സ്‌യാത്ര..!
ഒരു ചെറിയ യാത്രയിലായിരുന്നു ഞാൻ. ബസ്സിൽ കയറുന്നതിനു മുന്പുതന്നെ ഉറങ്ങുന്ന ശീലം എനിക്ക് പതിവാണ്. പരിസരബോധം അല്പം പോലും തൊട്ടു തീണ്ടാത്ത അവസ്ഥ. പതിവ് പോലെ അന്നും ബസ്സിൽ കയറിയതെ ഉറക്കം ആരംഭിച്ചു.. ഉറക്കം തൂങ്ങി തുടങ്ങിയതെ തൊട്ടടുത്തിരുന്ന വല്യമ്മ എന്നെ ഒന്ന് തോണ്ടി. ദേഷ്യം വന്നെങ്കിലും ചിരിച്ച മുഖത്തോടെ ഞാൻ ചോദിച്ചു എന്താ അമ്മമ്മേ? മോളെ ഈ ബിസ്കെറ്റ് ഷുഗർ ഉള്ളൊരു കഴിക്കുന്നതാണോ? ബിസ്കെറ്റ് വാങ്ങി നോക്കിക്കൊണ്ട് ഞാൻ പറഞ്ഞു അതെ ഇതു ഷുഗർ ഫ്രീയാ... അല്ല, മോള് എവിടുത്തെയാ, നല്ല കണ്ടുപരിചയം ഉണ്ടല്ലോ. ഞാൻ ഒന്ന് ചിരിച്ചു മറുപടി നല്കി. അല്പം ഉറക്കെ വല്യമ്മ പറഞ്ഞു, ഒഹ്.. ചാണ്ടി ചെട്ടന്റെ കൊച്ചുമോളാ ല്ലേ?. . ബസ്‌ കുറച്ചധികം മുൻപോട്ടു നീങ്ങി.
വീണ്ടും ഉറക്കം ആരംഭിക്കാനുള്ള പുറപ്പാടാണെന്നു മനസിലാക്കിയാവണം, വല്യമ്മ വീണ്ടും എന്നെ ഒന്ന് തോണ്ടി. മോള് പഠിക്കുവാണോ, ഏതു പള്ളിലാ പോവുന്നെ?? ഞാൻ പറഞ്ഞു; ആഹ്, ഞാൻ പഠിക്കുവാ. എന്താ അമ്മമ്മേ കല്യാണാലോചന ആണോ ? ഒന്ന് ചിരിച്ചതല്ലാതെ വല്യമ്മ ഒന്നും മിണ്ടിയില്ല.. വല്ലാത്ത നടുവിന് വേദനയാ, ഈ തണുപ്പിന്റെയാവും വല്യമ്മ പിറുപിറുത്തു.
പഞ്ഞമാസത്തിലെ മഴക്ക് അല്പം തണുപ്പ് കൂടുതലാണ്. മഴ പെയ്തു തൊർന്നതിനാലാവാണം ബസ്സിന്റെ ഷട്ടർ ഉയർത്തിയപ്പോൾ മഴത്തുള്ളികൾ മുഖത്തേയ്ക്ക് ആഞ്ഞടിക്കുന്നുണ്ടായിരുന്നു. വല്ലാത്തൊരു സമാധാനം തോന്നി, കുറെയധികം ഗ്രഹാതുരത്വവും. മഴത്തുള്ളികൾ തട്ടി തടഞ്ഞ മരച്ചില്ലകൾക്കും ഇലകൾക്കും പതിവിലേറെ ഭംഗിയും തോന്നാതിരുന്നില്ല. പ്രകൃതി സൗന്ദര്യം അങ്ങനെ ആസ്വദിച്ചു മുന്നോട്ടു പോവുമ്പോൾ വല്യമ്മ വീണ്ടും എന്നെ ഒന്ന് തോണ്ടി... അല്ല മോളെ കല്യാണാലോചന ഒക്കെ ആവുമ്പോ പറയണേ. നല്ല ചെക്കന്മാർ ഉണ്ട്. അമ്മമ്മ ചെറിയൊരു കല്യാണ ബ്രോക്കർ ആണല്ലേ ? ചെറിയൊരു പരിഹാസത്തോടെ ഞാൻ ചോദിച്ചു. ജീവിക്കണ്ടേ മോളെ... ചെറുതായും വലുതായും വല്യമ്മ ചിരിച്ചുകൊണ്ട് തന്നെ മറുപടി പറഞ്ഞു.. ജീവിക്കാൻ വേണ്ടി മനുഷ്യൻ ഓടുന്ന നെട്ടോട്ടം ആലോച്ചപ്പോഴേക്കും വണ്ടി വലിയ ബസ്സ്‌ സ്റ്റാൻഡിൽ നിർത്തിയിരുന്നു..പെട്ടന്നാണ് ഒരു വലിയ ശബ്ദം കേട്ട് ബസ്സിനുള്ളിലെയ്ക്ക് ഞാൻ നോക്കിയത്. ഒരു മലയാളം ഇംഗ്ലീഷ് നിഘണ്ടു വില്പനയുമായി എത്തിയ മനുഷ്യൻ. അയാളുടെ സംസാരം വളരെ ആകർഷകമായിരുന്നു.
" കന്യാസ്ത്രീ മഠത്തിനെ നമ്മൾ ഇംഗ്ലീഷിൽ കോൺവെനറ് എന്ന് പറയും എന്നാൽ കന്യാസ്ത്രീയെ എന്ത് പറയും?, അതുപോലെ തേങ്ങക്ക് ഇംഗ്ലീഷിൽ കോക്കനട്ട് എന്ന് പറയും എന്നാൽ കരിക്കിന് ഇംഗ്ലീഷിൽ എന്ത് പറയും ?, ആനക്ക് എലഫെനറ് എന്ന് പറയും ആന പാപ്പാന് എന്ത് പറയും? നമ്മൾ ദിവസേന ഉപയോഗിക്കുന്ന മത്തി, അയല, കരിമീൻ എന്നെ മത്സ്യങ്ങൾക്ക് ഇംഗ്ലീഷിൽ എന്ത് പറയും.? ചിലർ കരിമീനിനു ബ്ലാക്ക്‌ ഫിഷ്‌ എന്ന് പറയും എന്നാൽ അത് തെറ്റാണ്. ഇത്തരത്തിലുള്ള ഇംഗ്ലീഷ് വാക്കുകൾ വെറും 20 രൂപക്ക് നിങ്ങള്ക്ക് ലഭ്യമാണ്." ഇതു പറഞ്ഞു തീർന്നതും 20 രൂപയുടെ നിഘണ്ടു വാങ്ങാൻ ബസ്സിലെ സകല ആളുകളും ക്യൂ ആയി. അങ്ങനെ സന്തോഷത്തോടെ 20 രൂപ എണ്ണി പോക്കെറ്റിലിട്ട് അയാള് ബസ്സിൽ നിന്നും ഇറങ്ങി. കുറച്ചധികം അത്ഭുതത്തോടെ ഞാൻ അയാളെ തന്നെ ശ്രദ്ദിച്ചു. വളരെ സന്തോഷവാനായി അയാൾ അടുത്ത ബസ്സിലെക്ക് കയറി. അപ്പോഴേക്കും ബസ്‌ വീണ്ടും ഓടി തുടങ്ങി. സമയം തെല്ലു നീങ്ങി ശ്വാസം ഒന്ന് വലിച്ചുവിട്ടു കൈകൾ നെഞ്ചോടു ചേർത്ത് ഞാൻ മനസ്സിൽ പറഞ്ഞു “ഞാൻ സന്തോഷവതിയാണ്”. വീണ്ടും വല്യമ്മ എന്നെ തോണ്ടി, ഞാൻ കുറച്ചു ദേഷ്യത്തോടെ നോക്കി, എനിക്ക് ഇറങ്ങാറായി പോകുവാണേ.. ഞാൻ പ്രാർഥിക്കാം കേട്ടോ പഠിച്ചു മിടുക്കിയാവ്, പറഞ്ഞതൊന്നും മറക്കണ്ടാട്ടോ വല്യമ്മ കൂട്ടിച്ചേർത്തു... ശരി അമ്മമ്മേ. ബസ്സ്‌ വീണ്ടും നീങ്ങി തുടങ്ങി... ഒപ്പം ഒന്നും പറഞ്ഞു തീർക്കാതെ കർക്കിടക മാസത്തിലെ മഴയും...
